गत वर्षको 4 अक्टोबरको विपत्तिको पुनरावृत्तिको डरले रातभरि बामनडाङ्गा चियाबारीको मोडल भिलेजसहित सम्पूर्ण नगराकट्टाका वासिन्दाहरूले जाग्राम बसेर रात बिताए। राति निरन्तर अत्यधिक वर्षा भयो। हड्पा बाढ़ीका कारण सुखानी र राङ्गाती नदीको जलस्तर बढ़ेर विभिन्न क्षेत्रमा पस्यो। यसले 30 वटा घर जलमग्न भए। पानीको तीव्र बहाउले नदीका केही गार्डवाल पनि भत्किएका छन्। धेरै कल्भर्टहरू भत्किँदा यातायात व्यवस्था अस्तव्यस्त भएको छ। एउटा कङ्क्रिटको बाँध पनि भत्किएको छ। तीव्र गतिमा गाउँमा नदीको पानी पस्दा राति नै आतङ्कित भएर केही क्षेत्रका मानिसहरू गाउँ छोड़ेर भागे। साना वाहन, बाइक लगायत घरका मूल्यवान सामानहरू सुरक्षित स्थानमा सारियो। समग्रमा नगराकट्टाका विभिन्न गाउँका वासिन्दाले रातभरि जाग्राम बसेर समय बिताए।
बामनडाङ्गा मोडल भिलेजका वासिन्दा सोरेल तिग्गाले भने, रातभरि मुसलधारे वर्षा भयो। मङ्गलवार अबेर राति टण्डुबाट फोन आयो। त्यहाँ रहेका हाम्रा एक आफन्तले टानाटानी नदीको पानी बढ़ेको जानकारी दिए साथै जलढाका नदीको पानी पनि बढ़िरहेको बताउँदै सावधान रहने सुझाउ दिए। डरका कारण रातभरि सुत्न सकेनौँ, जाग्राम बस्यौँ।
नगराकट्टा बस्तीका हासु शेखले भने, राति सुखानी नदीको पानी बढ़ेर हाम्रो घरभित्र पस्न थाल्यो। हामी परिवारका 12 जना कुनै तरिकाले घरबाट निस्केर पक्की सड़कमा पुग्यौँ। सड़कमै रातभरि बस्यौँ। टोटो चालक सुजान शेखले भने, सुखानीको पानी बढ़ेर हाम्रो घरभित्र पस्यो। टोटो चलाएर जीविका चलाउँछु। धेरै कठिनाइका साथ टोटो सुरक्षित स्थानमा पुर्या एँ। सोही क्षेत्रका वासिन्दा तथा सुल्कापाड़ा ग्राम पञ्चायतका सदस्य सुदामा उरावँले भने, राति जसरी मुसलधारे वर्षा भयो त्यसले 30 वटा घरमा नदीको पानी पस्यो। 4 अक्टोबरको नदीको बाढ़ी सम्झना आयो जसमा 11 जनाको मृत्यु भएको थियो। नगराकट्टाका बीडीओ जयप्रकाश मण्डलले भने, हड्पा बाढ़ी आएको थियो। 30 वटा घरमा सुखानी नदीको पानी पसेको जानकारी पाएको छु। हाम्रो टोली निरीक्षणका लागि घटनास्थल गएको छ। रिपोर्ट पाएपछि क्षतिको परिमाण थाहा हुनेछ।