स्टुडेण्ट फोरम अफ इण्डिया (एसएफआई) को दार्जीलिङ जिल्ला समितिले बिहीवार सिलगढ़ीस्थित एसडीओ कार्यालयबाहिर विद्यार्थी सम्बन्धी विभिन्न माग उठाउँदै विरोध प्रदर्शन गरेको छ। विद्यार्थीहरूले सामना गरिरहेका विभिन्न समस्यालाई उजागर गर्दै उक्त प्रदर्शन आयोजना गरिएको थियो। प्रदर्शनकारीहरूले सरकारी विद्यालयहरूको पूर्वाधार सुधार गर्नुपर्ने माग गरे अनि अतिरिक्त शुल्क असुली अन्त्य गर्नुपर्ने पनि माग राखेका छन्।
प्रदर्शनका क्रममा तिनीहरूले चियाबारी क्षेत्रका विद्यार्थीहरूका लागि विशेष सरकारी छात्रवृत्ति र भत्ताको व्यवस्था गर्नुपर्ने पनि माग गरेका थिए। संस्थाका सदस्यहरूले सार्वजनिक यातायातमा विद्यार्थीहरूका लागि विशेष सहुलियतको व्यवस्था गर्नुपर्ने माग पनि अघि सारे। तिनीहरूले यात्राको बढ्दो खर्चका कारण धेरै विद्यार्थीहरूलाई नियमित रूपमा विद्यालय जान कठिन भइरहेको मुद्दा पनि उठाए।
सूत्रअनुसार प्रदर्शनकारीहरूले एसडीओ कार्यालयभित्र प्रवेश गर्ने प्रयास गर्दा तिनीहरूले पुलिसबाट प्रतिरोधको सामना गर्नु परेको थियो। कार्यालयको गेट बन्द गरिएको अनि तिनीहरूलाई भित्र पस्न नदिइएको आरोप लगाइएको छ। त्यसपछि एसएफआईका सदस्यहरूले कार्यालयअघि धर्ना प्रदर्शन गरे।