बिजनबारी पुलबजार ग्राम पञ्चायतकी प्रधान पदमा सुब्बाले आफ्नो प्रधान पदबाट औपचारिक रूपमा राजीनामा दिएकी छन्। उनले दार्जिलिङ पुलबजार खण्ड विकास अधिकारी (बीडीओ) तरुण देवसमक्ष आफ्नो राजीनामा पत्र बुझाएकी हुन्।
बिजनबारी पुलबजार ग्राम पञ्चायतको बोर्ड हाल भारतीय जनता पार्टी (भाजपा) को नियन्त्रणमा रहेको छ। प्रधान पदबाट पदमा सुब्बाको अचानक राजीनामापछि स्थानीय राजनीतिक क्षेत्रमा विभिन्न अड्कलबाजीसँगै नयाँ राजनीतिक हलचल उत्पन्न भएको छ।
पत्रकारहरूसँग कुराकानी गर्दै सुब्बाले आफ्नो राजीनामाको कारण स्पष्ट पार्दै भनिन्, “मैले पूर्ण पारदर्शिता र निष्ठाका साथ जनताको सेवा गर्ने प्रयास गरेकी थिएँ। तर, केही सदस्यहरूबाट निरन्तर सहयोगको अभाव तथा जारी आन्तरिक व्यवधानका कारण प्रधानको रूपमा आफ्ना जिम्मेवारीहरू प्रभावकारी ढङ्गले निर्वाह गर्न चुनौतीपूर्ण बन्दै गइरहेको थियो।”
उनले स्थानीय स्वशासनको सफल सञ्चालनका लागि सामूहिक प्रयास र एकताबद्ध टोलीको आवश्यकता पर्ने उल्लेख गर्दै पर्याप्त सहयोगबिना प्रशासनिक जिम्मेवारीहरू प्रभावकारी रूपमा पूरा गर्न कठिन भएको बताइन्।
प्रधान पदबाट राजीनामा दिए तापनि पदमा सुब्बाले आफ्नो बाँकी कार्यकालसम्म निर्वाचित वार्ड सदस्यको हैसियतमा स्थानीय जनताको सेवामा निरन्तर समर्पित रहने प्रतिबद्धता व्यक्त गरेकी छन्।
यस राजीनामापछि बिजनबारी पुलबजार ग्राम पञ्चायतको आगामी नेतृत्व र राजनीतिक समीकरणलाई लिएर स्थानीय क्षेत्रमा चासो बढेको छ।